World of Greenland pillugu

Nunatsinni angalanerit illuikkiaqarfiillu assissaqanngitsut

World of Greenland misigisassanik annertuunik tunniusserusunnermit ingerlatinneqarpoq. Nunatsinni illuaraqarfinnik assissaqanngitsunik inerisaallutalu ingerlatsisuuvugut. Illuaraqarfigut alianaalluinnartumik inissisimaffeqarnerup isumaliutigilluakkamillu najoqqutassaqarnerup iluatsilluarnerisigut, tikeraartitsinnut puigugallagassaanngitsumik immikkuullarissumik piviusumillu misigititsisussamik tamarmik peqarnermikkut assigiipput.
Illuaraqarfinnik assissaqanngitsunik ingerlatsinerup saniatigut, Ilulissaniit misigisassarsiorluni angalanernik- ilaatigut immakkut angallatit atorlugit angalanernik, kulturimut tunngatillugu angalanernik imal. qulimiguulimmik angalanernik il.il. aaqqissuusisarpugut.

World of Greenland suliffeqarfissuarmut Air Greenlandimut ilaavoq taamaalillutalu nunatsinni inuiaqatigiinnit pigineqarpugut.

Niuernerpalaartumik ingerlatseqatigiiffiuvugut, 2007-imi januaarip ulluisa aallaqqaataanni pilersinneqarpugut, Air Greenlandimiillu pigineqarluta. Ukiut tamaasa sinneqartooruteqarpat, taakkunannga suliniutissanut nutaanut, nunatta nunani tamalaani ornitassatut piujuartitsisutut pissanganartutullu avammut nittarsaannissaanut iluaqutaasussanut, piginnitsigut aningaasaleeqqittarput.

Takornariaqarnermi ileqquujartortut eqqumaffigiuarpagut, tamakkununngalu tunngatillugu siulliulluta saqqummiussisarluta. Tikeraartitsinnut suleqatitsinnullu qanimut attaveqarnitsigut isumassarsiat nutaat naliliivigiuarpagut, pingaaruteqarnerpaanillu, nunatsinni takornariaqarnermi inuussutissarsiornermilu iliuuserisanut annertunerusunut maligassiuisussatut suliniutinngortussanik aallartitsisarluta.

Visit Greenlandip nuna tamakkerlugu takornariaqarnermi iliuusissatut siunniussaa najoqqutaralugu siunnerfeqarluta suleqatigiinnikkut – najukkani nunalu tamakkerlugu angusaqarnerunissarput upperalugu sulivugut.

World of Greenlandip suliassaa tassaavoq angalasumut narrutuumut pitsaassutsimillu ilisimaarinnittumut; pitsaasutsimik, akisussaassutsimik piujuartitsisumillu ineriartornermik ukkassiuarnikkut, alutornarnerpaanik assissaqanngitsunillu misigisaqartitsinissaq.

World of Greenlandip anguniagassatut takorluugaa tassaavoq inerisaanikkut suleqateqarnikkullu piujuartitsisumik nunatsinnik kivitsinissaq.

World of Greenland, ilinnut annertunerulaamik angusaqarusuttumut, ilinnut nunatta takutissinnaasaanik misigisaqarusuttumut, ilinnut nalinginnaanngitsumukarnissamut sapiissuseqartumut, minnerunngitsumillu ilinnut nunarput aqqusaarlugu angalaninni qanoq sunniuteqarnissamik pingaartitsisumut naleqquttuuvoq.

Takornariaqarnikkut piujuartitsisumik inerisaaneq

Suliffeqarfissuup Air Greenlandip anguniagassatut pingaarnertut takorluugaa tassaavoq, najukkami inuussutissarsiorfiit peqatigalugit piujuartitsisumik inerisaanikkut suleqateqarnikkullu, nunatta kivinnissaa.

World of Greenland nunatta soqutigisaanik isumaginninnissamut, najukkamilu takornariaqarnermik piujuartitsisumik inerisaanermik siuarsaaqataanissamut pisussaaffeqarpoq.

Najukkami takornariaqarnermik piujuartitsisumik inerisaanermi ukkassassat immikkoortut pingasut tassaapput…

Nunap immikkoortuinut allanut siammarnissaq

Illuaraqarfinnik pilersitsinikkut takornariaqarnerup nunatsinni siammarnerunissaanik suliniuteqarneq. Tamanna nunap immikkoortuini assigiinngitsuni suliffissanik aningaasarsiornikkullu ineriartornermik pilersitseqataassaaq.

Takornariartitsisarnerup sivitsornissaa

Ukiuunerani- ukiorlu naallugu misigisassanik inerisaanikkut, piffissap takornariartitsiviusartup sivitsornissaata anguniarneqarnissaa. Tamatumani ukioq kaajallallugu suliffeqarsinnaanermik qulakkeerinissaq najukkamilu takornarialerinermut soqutiginnilersitsinissamut kajumissaarinissaq siunnerfiupput.

Najukkami suleqatigiinnissaq

Takornarialerinermi najukkami periarfissatigut- piginnaasatigullu ineriartortitsineq nukittorsarniarlugit, takornarialerisunik allanik suleqateqarnissamik salliussineq.

Illuaraqarfik piujuartitsisoq

Piujuartitsineq World of Greenlandip nioqqutissanik inerisaanerani pingaarutilimmik inissisimammat, illuaqqiorfitsinni avatangiisinut silallu pissusaanut sunniuteqartunik annikillisaanissaq pingaaruteqarpoq.

Illuaraqarfitsinni piujuartitsisumik inerisaanermi ukkassassat pingaarnerit pingasut tassaapput…

Illuaqqat piujuartitsisut

Illuaraqarfitsinni ataavartumik nukissiuuteqarneq annertuumik atorparput, atortussallu sapinngisamik minnerpaamik CO2-mik aniatitsiviusut avatangiisinillu ajoqusiinnginnerusut sanaartornermi atorlugit.

Angallassineq

Najukkami nioqqutinik sapinngisamik amerlanerpaanik pisisarnikkut pilersuinikkullu, angallassinermi isorartussutsit sapinngisamik annikillisarniarsaraagut.

Eqqakkat atueqqiinerlu

Illuaraqarfimmik ingerlatsinerup immikkoortuini tamani, tamatumunngalu atatillugu sanaartornermi atortussanik, pisattanik nerisassanillu sapinngisarput tamaat atueqqiisarpugut.

Illuaraqarfiit pillugit immikkut quppernerni, qanoq illuaraqarfiit ataasiakkaat piujuartitsinissamik suliniuteqarnerat pillugu paasisaqarnerusinnaavutit.

Ilulissani angallassisarnerit

Illuaraqarfinnik inerisaanerup ingerlatsinerullu saniatigut, World of Greenland- angallassisartut allat peqatigalugit- tikeraanik ullormut misigisassarsiorluni angallassinernik aaqqisuisartumik, Ilulissani immikkoortortaqarportaaq.
Najukkami suleqatigisagut suliffeqarfissuup nunatsinnik kivitsinissamik takorluugaanut pingaarutilittut ilaapput. Najukkami suleqatigiinnerit aqqutigalugit takornariaqarnermik inerisaanermi, inuttut atukkatigut aningaasaqarnikkullu piujuartitsinermik qulakkeerinissaq kissaatigaarput.